Leviticus 16
Thoihdamna Ni
1Aaron tapa nihte in TOPA naiha a sih khit nungun TOPA in Moses a hopih hi. 2TOPA in Moses tungah: “Na sanggampa Aaron, singkuangpi tunga om thoihdamna sin mai, puanzak liah, Mun Siangtho Pen sungah a ut hunhuna, a lut loh nadingin gen in; tua hi kei leh amah si ding hi. Bang hang hiam cih leh tua thoihdamna sin tunga meiipi sungah kei ka kilang hi. a 3 “Mun siangtho huang sunga Aaron lut nading zia hih bang ahi hi: Mawhna hanga biak nading bawngtalno khat le meihal biakna dingin tuutal khat a keng ding hi. 4Saihadial puantungsilh siangtho silhin a pumpi tungah saihadial puan sungsilhte silh dinga, saihadial puan kawnggak tawh gakin saihadial puan khim ding hi. Hihte pen puansilh siangtho ahi hi; tua ahi ciangin hihte a silh ma-in a kipumsil pelmawh ding hi. 5Israel mipite panin mawhna hanga biak nading keeltal nih le meihal biakna dingin tuutal khat a keng ding hi. 6 “Aaron in ama mawhna hanga biakna-in bawngtal pia dinga, amah le a innkuanpihte adingin thoihdamna a bawl ding hi. 7Tua ciangin keel nihte la dinga Kikhopna Puanbuk lutna TOPA mai-ah pia ding hi. 8Amah in keel nihte tungah aisan dinga - ai khat TOPA ading hi-in a khat pen mawhpua keel ▼▼16.8 Tua in phelkhiatna keel; Hebrew in azazel; tg 10 le 26 ah zong
ading ahi hi. 9Aaron in TOPA adingin ai a tukna keel pen paipihin mawhna hanga biak nadingin a pia ding hi. 10Ahi hangin mawh pua keel adingin ai a tukna pen mawhpua keelin gam sungah khahkhiatna tawh thoihdamna bawl nadingin TOPA mai-ah a hingin kipia ding hi. c 11 “Aaron in ama mawhna hanga biakna-in bawngtal pia dinga, amahmah le a innkuanpihte ading thoihdamna bawlin ama mawhna hanga biakna dingin bawngtal a go ding hi. 12Amah in TOPA mai biakna-tau panin mei-am a dim gim namtui beel le hoihtaka kigawi vui a namtui mahmah gimnamtui khut dim nih la-in puanzak nungah a paipih ding hi. 13Amah in TOPA mai-ah tua gim namtui mei tungah buak dinga, amah a sih loh nadingin tua gimnamtui khu in Tecipanna tung sana thoihdamna sin a khuut ding hi. 14Amah in bawngtal sisan pawlkhat la-in a khutme tawh thoihdamna sin mai theh ding hi; tua ciangin pawlkhat a khutme-in la dinga thoihdamna sin mai sagih vei a theh ding hi. d 15 “Tua khit ciangin amah in mipite mawhna hanga biakna-in tua keel go dinga a sisan puanzak nungah paipih in bawngtal sisan tawh a hih bangin tua tawh a hih ding hi: Amah in thoihdamna mai le a sin tung theh ding hi. 16Israel-te sianlohna le a lehdonate uh - a bawlsa uh mawhnate hangin hici bangin Mun Siangtho Pen adingin thoihdamna a bawl ding hi. Amah in amaute siantholohna laizanga amaute laka Kikhopna Puanbuk adingin zong hici bang mahin a hih ding hi. 17Mun Siangtho Pen sungah thoihdamna bawl dinga Aaron a luta kipan, ama ading, a innkuante ading le Israel mihon buppi adingin thoihdamna bawl manta-a a pai khiat mateng tua Kikhopna Puanbuk sungah kuamah a om kei ding hi. e 18 “Tua khit ciangin amah TOPA mai-a biakna-tau pan paikhia-in tua adingin thoihdamna a bawl ding hi. Amah in bawngtal sisan le keel sisan pawlkhat la-in biakna-tau kite khempeuh a nuh ding hi. 19Amah in Israel-te sianlohna pan tua biakna-tau siansuah a, ap nadingin a khutme tawh sisan sagih vei a theh ding hi. 20 “Aaron in Mun Siangtho Pen, Kikhopna Puanbuk le biakna-taute thoihdamna bawl a man ciangin tua keel a hinglai pen a paikhiatpih ding hi. 21Amah in tua a hinglai keel lutungah a khut gel nga dinga, Israel-te gitlohna le a lehdonate khempeuh uh - amaute mawhna khempeuh tua keel lutungah a suan ding hi. Amah in hih nasem dinga a seh mi khat khut tungah tua keel gam sungah a khahmang ding hi. 22Tua keel in amaute mawhna khempeuh pua-in gam simtham ah a paipih ding hi; tuaci-in mipa in gamlak ah a khah ding hi. f 23 “Tua khit ciangin Kikhopna Puanbuk sungah Aaron lut dinga, Mun Siangtho Pen sunga a lut ma-in a puansilh saihadial puante suahkhia-in tua munah nusia ding hi. 24Amah mun siangtho khatah tui-in kipumsil dinga ama puansilh ngeite a silh ding hi. Tua ciangin amah paikhia dinga, amah le mipite thoihdamna bawlna-in ama ading meihal biakna le mipite ading meihal biakna amah mah in a pia ding hi. 25Amah in biakna-tau tungah mawhna hanga biakna thau zong a hal ding hi. g 26 “Tua mawhpua keel-a keel khat a khahpa in pel loin a puansilhte sawpin tui-in kipumsil ding hi; tua khit ciangin a giahphual sungah tum thei pan ding hi. 27Thoihdamna bawl nadinga Mun Siangtho Pen sunga a sisan kipaipih tua mawhna hanga biakna bawngtal le keel, pel loin giahphual pua-ah kipaikhiatpih ding hi; tuate vunte, a satak le a ekte kihaltum ding hi. 28Tuate a halte in pel loin a puante uh sawpin tui-in a kipumsil ding uh hi; tua khit ciangin giahphual sungah tum thei pan ding uh hi. 29 “Hih in note adingin tawntung thuzek hi ding hi: A kha sagihna a nisawm ni-in note - tualsuak na hi uh a, no lak a teng pemta mi khatpeuh ahi zongin no le no ▼▼16.29 Ahikeh na tang pelmawh ding uh hi tg. 31 ah zong
kidekin bangmah na sem kei ding uh hi. - 30bang hang hiam cih leh tua ni-in na sian nadingun note ading thoihdamna kibawl ding hi. Tua ciangin TOPA mai-ah note na mawhna khempeuh panun na siang ding uh hi. 31Tua in Sabbath khawlni hi-a, no le no na kidek pelmawh ding uh hi; tua in a kipden thuzek khat ahi hi. 32A pa za laih dingin tulpi dinga sathau kinilh a, kipsakna kipiapa in thoihdamna a bawl ding hi. Amah in a siangtho saihadial puan silhin 33Mun Siangtho Pen ading, Kikhopna Puanbuk ading, le biakna-tau ading le siampite ading le mipite khempeuh adingin thoihdamna a bawl ding hi. i 34 “Hih in note adingin a kip den thuzek hi ding hi. Israel mite khempeuh mawhna tangin kum khatin thoihdamna khatvei kibawl ding hi;” a ci hi. j Tua hi a, tua pen TOPA in Moses a thupiak banga kihih ahi hi. k
Copyright information for
ZomZIV